Татарстанның Менделеевск районы мәктәпләрендә көчле суыклар аркасында дәресләр булмаячак
Татарстанның Менделеевск муниципаль районы дүшәмбе көнне, 9 гыйнварда, һава температурасы түбән булу сәбәпле барлык шәһәр һәм авыл мәктәпләрендә I-XI сыйныфларда укучылар өчен дәресләр үткәрелмәячәге турында карар кабул итте.
«Шулай ук балаларны мәктәп автобусларында йөртүне вакытлыча туктату һәм аларны муниципаль берәмлек чикләреннән чыгармау турында да карар кабул ителде», - дип хәбәр итте район башлыгы Радмир Беляев үзенең Telegram-каналында.
Район хакимиятендә «Татар-информ» агентлыгына белдерүләренчә, 10 гыйнварда дәресләр үткәреләчәкме-юкмы һәм балаларны мәктәп автобусларында йөртүне вакытлыча туктату кирәкме дигән карар дүшәмбе көнне кабул ителәчәк.