Казанның сигез мәчетендә Коръән укырга өйрәнү курслары узачак
23 гыйнварда Казан мәчетләрендә Коръән укырга өйрәнү буенча түләүсез курслар башлана. Дәресләр Рамазан ае алдыннан атнага ике тапкыр ике ай дәвамында узачак.
ТР Диния нәзарәте матбугат хезмәте хәбәр иткәнчә, курслар гарәп алфавитын һәм Коръән уку кагыйдәләрен өйрәнергә теләүчеләр өчен туры киләчәк. Дәресләрне компетентлы мөгаллимнәр һәм белгечләр үткәрәчәк.
Уку киләсе атнада шәһәрнең 8 мәчетендә башланачак:
«Әниләр» (Газ ур., 18);
«Әмәт» (Дачная ур., 3а);
«Иман нуры» (Дорожная ур., 32);
«Нурислам» (Муса Бигиев ур., 36);
«Гаилә» (Фәйзи ур., 2);
«Казан нуры» (Фатыйх Әмирхан ур., 3, корп.2);
«Рәшидә» (Цветочная ур., 24);
«Әхмәтзәки» (Яңа Осиново тыкрыгы, 16а).
Курслар тәмамлангач, тыңлаучылар сертификатлар алачак. Тулырак мәгълүматны +7(903)306-25-91 телефоны буенча белергә мөмкин.