Рөстәм Миңнеханов Әлмәттә 110 урынга исәпләнгән балалар бакчасы ачты

Татарстан Рәисе Рөстәм Миңнеханов Әлмәттә 110 урынга исәпләнгән 22нче номерлы балалар бакчасын ачты. Мәгариф учреждениесе «Алсу» микрорайонында урнашкан.

«Бүген без 110 урынга исәпләнгән «Алсу» балалар бакчасының заманча һәм төзекләндерелгән корпусын ачабыз. Балалар һәм ата-аналар бу вакыйганы көтеп алды. Сезне бу искиткеч вакыйга белән котлыйм! Без балаларның үсеше һәм тәрбиясе өчен кирәкле барлык шартларны тудырырга шат - бу безнең өстенлегебез», - диде республика Рәисе.

Бүген «Алсу» микрорайонына балалы яшь гаиләләр яшәргә килә. Биредә халык саны 15 мең кешегә җиткән. Бүгенге көнгә кадәр биредә ике мәктәпкәчә учреждение эшләгән.

Яңа балалар бакчасы ачылу әлеге микрорайонда мәктәпкәчә белем бирүнең сыйфатын яхшыртуга тагын бер адым булды, дип билгеләп үтте район башлыгы Тимур Нагуманов.

Ул Рөстәм Миңнехановка «шәп бүләк» өчен рәхмәт әйтте.

«Без балалар бакчасы турында озак хыялландык. Бөзнең төзүчеләр иң алдынгы карарлар буенча эш итте. «Алсу» микрорайонында социаль инфраструктураны үстерергә кирәк. Бу микрорайонда яшәүче ата-аналардан мөрәҗәгатьләр күп булды. Ярты ел элек биредә «Адымнар» күптелле мәктәбе ачылды. Сезгә зур рәхмәт! Мәктәпкәчә мәгариф оешмасында урыннар җитми иде, хәзер 110 бала яхшы шартларда шөгыльләнәчәк. Барыгызны да котлыйм!» - диде Нагуманов.

Балалар бакчасында музыка залы, физкультура залы, психология бүлмәсе, татар һәм инглиз телләре бүлмәсе, медицина блогы, азык-төлек блогы, кер юу урыны бар. Учреждение территориясендә 5 уен мәйданчыгы урнашкан. Балаларның музыкаль, бию-ритмик сәләтләрен үстерүгә, инглиз һәм татар телләрен өйрәнүгә юнәлтелгән өстәмә белем бирү хезмәтләрен оештыру планлаштырыла.