Тольяттида «Татар кызы – балалар» матурлык һәм сәләт бәйгесе узды

18 февральдә Тольятти шәһәрендә ел саен үткәрелә торган «Татар кызы – балалар» бәйгесе узды. Аны Тольятти шәһәре татарларының шәһәр милли-мәдәни автономиясе оештырды. Бәйге Тольятти шәһәр округы Администрациясенең җәмәгатьчелек белән хезмәттәшлек идарәсенең этноконфессиональ мөнәсәбәтләр бүлеге һәм Самара өлкәсе Халыклар дуслыгы йорты ярдәмендә үтте. «Самар татарлары» сайты шул турыда яза.

Ел саен үткәрелә торган матурлык һәм сәләт бәйгесе татар халкының гореф-гадәтләрен, йолаларын һәм татар телен торгызу һәм үстерүгә, бай мәдәни мирасны саклауга, шулай ук туган як традицияләренә һәм гореф-гадәтләренә мәхәббәт хисе тәрбияләүгә юнәлдерелгән.

Быел конкурста 12 кыз бала һәм ике малай катнашты.

Аларның барысына да берничә сынау үтәргә туры килде – башта алар үзләрен жюри һәм кунакларга туган телләрендә тәкъдим итте, ә аннары җыелган кешеләрне үзләре әзерләгән татар ризыклары белән сыйлады. Аннан соң иҗади бәйге булды: балалар туган телдә җырлар башкарды, халык биюләрен биеде, акробатик номерларда көч сынашты. Татар милли киемен тәкъдим итә белү программаның мәҗбүри өлешенә әверелде. Ә ярышны дөньяви образдагы финал дефиле тәмамлады.

«Мисс татар кызчыгы – 2023» итеп Алия Ильясова (11 яшь), I вице-мисс – Азалия Насыйрова (9 яшь) һәм II вице-мисс Әминә Бесаева (8 яшь) сайланды. Бәйгедә катнашучыларга Тольятти шәһәре татарларының милли-мәдәни автономиясеннән истәлекле дипломнар һәм кыйммәтле бүләкләр тапшырды, диелә хәбәрдә.