Республика Хөкүмәте 2026 елга кадәр Татарстанны цифрлаштыру буенча бурычлар куйды
Татарстанда 2023 елга һәм 2026 елга кадәрге план чорына республиканы цифрлаштыру буенча чаралар планы һәм бурычлар расланды. Шул турыдагы карарны Татарстан Республикасы Премьер-министры Алексей Песошин имзалады.
Бурычлар Татарстан Республикасы башкарма органнары һәм муниципаль хакимият органнары, министрлыклар, «Татмедиа» Республика матбугат һәм массакүләм коммуникацияләр агентлыгы, Татарстан Республикасы Тарифлар буенча Дәүләт комитетына куелды.
Мисалга, Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы критик мәгълүмати инфраструктура объектларының мәгълүмати куркынычсызлыгын тәэмин итү буенча чараларның типлаштырылган исемлеген эшләргә тиеш. Шулай ук министрлыкка былтыр үткәрелгән цифрлаштыру буенча чараларны анализларга һәм аларны оештыру методикасын камилләштерергә, республиканың мәгълүмат системалары реестрын булдыру буенча, электрон документ әйләнеше бердәм ведомствоара системасының сервер инфраструктурасын яңарту буенча тәкъдимнәр эшләү бурычы куела.
Татарстан Республикасы Сәламәтлек саклау министрлыгы телемедицина сервисы мәгълүмат системасын кертүне оештырачак, Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы белән бергә радиологик дата-үзәкне үстерү һәм бердәм медицина контакт-үзәген эшләтеп җибәрү буенча тәкъдимнәр эшләячәк.