Татарстанның Ютазы районында янгын чыккан фатирдан ир-атны коткарганнар
Кичә кич Гадәттән тыш хәлләр министрлыгына Ютазы районының Урыссу бистәсендә Киров урамындагы 44нче йорт подъездында төтен чыгуы турында хәбәр килгән.
Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр итүләренчә, янгын сүндерүчеләр фатирда ванна бүлмәсендә 3 квадрат метр мәйданда пластик панель януын ачыклаган.
Коткаручылар махсус битлек ярдәмендә фатирдан 59 яшьлек ир-атны алып чыккан. Аны төтен исенә агулану билгеләре белән Урыссу Үзәк район хастаханәсенә китергәннәр.
Якынча мәгълүматлар буенча, янгын тәмәке тартканда сак булмау нәтиҗәсендә чыккан.