Җәлилче Зиннәт Хәсәнов туганнары Иске Кәшер авылында аның исемен йөрткән урам булуын тели
Җәлилче Зиннәт Хәсәновның бертуганының улы Зиннәтулла Хәсәнов Сарман районы Иске Кәшер авылында каһарман исемен йөрткән урам кирәк дип саный.
«Безнең Совет урамына Зиннәт Хәсәнов исеме бирелсә, бик әйбәт булыр иде, чөнки ул шул урамда үскән. Мәктәптә без укыганда ук музее бар иде. Дружина да аның исемен йөрткән», – дип сөйләде ул «Татар-информ» хәбәрчесенә.
Район үзәгендә һәм Иске Кәшер күршесендәге Анак авылында Зиннәт Хәсәнов исемендәге урамнар бар. Иске Кәшер авылында җәлилчегә бюст куелган.
«Беренче бюст 1977 елның маенда куелган булган, 2005 елда ул реставрацияләнде. 2021 елда каһарманга яңа бюст куелды», – дип сөйләде «Зиннәт Хәсәнов һәм авыл тарихы» музее фәнни хезмәткәре Илдар Йосыпов.
Җәлилченең туган авылында аның исемен йөрткән мәктәп тә бар. Авылның спорт мәйданында (анда Сабантуй да уза) Зиннәт Хәсәнов аллеясы да бар.
Җәлилче Зиннәт Хәсәновның туган авылы Иске Кәшер турында тулы репортажны «Интертат» сайтында укырга була.