Ямпольская: Татарстан Россиянең этномәдәни байлыгын саклауга өлеш кертте
Милли этномәдәни төрлелек Россия Федерациясенең һичшиксез өстенлеге булып тора, ә Татарстан аны саклау мәсьәләсендә югары урын тота. Бу хакта бүген Россия Дәүләт Думасының мәдәният комитеты рәисе Елена Ямпольская әлеге комитетның Казанда узган күчмә утырышында белдерде.
Аның сүзләренчә, бүгенге көндә этномәдәни төрлелекне яклауны иң мөһим тема дияргә мөмкин, чөнки бу нәкъ менә халыкның бердәмлеген тәэмин итә, балаларны гасырлар дәвамында ата-бабаларыбыз саклаган милли традицияләр белән таныштыра, шулай ук кешеләрнең үз йортларында, үз җирләрендә яшәвен тоярга мөмкинлек бирә.
«Әлеге ике мөһим аспект – үзеңне туган йортта туганнарың арасында хис итү һәм янәшәдә яшәүчеләр белән берләшү. Алар башка милләт, башка дин халыклары булырга мөмкин, әмма без барыбыз да тарихи рәвештә бер җирдә яшибез», – дип уртаклашты Ямпольская Россия дәүләт төзелешенең тарихи механизмнары турында үз күзаллаулары белән.
Депутат билгеләп үткәнчә, Россиядә бергә яшәүче халыклар бер-берсеннән аерыла. Аларның һәрберсенең үз матурлыгы бар, аны ата-бабалар васыять иткән, ул җырларда, киемнәрдә, традицияләрдә, биюләрдә, театр һәм сынлы мәдәнияттә саклана.
Бүген Казан Кремлендә Россия Федерациясе Федераль Җыены Дәүләт Думасының мәдәният комитетының күчмә утырышы узды. Анда катнашучылар Россия Федерациясендә этномәдәни төрлелекне саклауны тәэмин итү өчен хокукый һәм оештыру нигезләрен булдыру мәсьәләсен тикшерде.