Июнь аенда «Черек күл» паркында инглиз һәм төрек телләре дәресләре узачак
Казанның «Черек күл» паркында инглиз һәм төрек телләре дәресләре узачак. Аларда теркәлү буенча бушлай катнашырга мөмкин.
Төрек теле дәресе 8 июньдә узачак. Измирдан (Төркия) килгән укытучы белән бергә казанлылар төп сүзләрне өйрәнәчәк.
22 июньдә узачак инглиз теле дәресендә ару турында сөйләшәчәкләр, ә 29 июньдә – читтән торып эшләү турында.
Дәресләр 18:30 сәгатьтә парк амфитеатрында башланачак, дип хәбәр иттеләр Казанның парклар һәм скверлар дирекциясендә.
Исегезгә төшерәбез, җәй көне «Черек күл» паркы ачык лекторий форматында эшләячәк. Мәйданчыкта белем бирү лекцияләре, психологлар белән очрашулар һәм «Мәдәни чәршәмбе» чаралары планлаштырылган.