Андрей Фурсенко Татарстанны көчле икътисад булдыру үрнәге дип атады

Россия Президенты ярдәмчесе Андрей Фурсенко фикеренчә, Россия составындагы Татарстан Республикасы ул - төрле карашлар һәм белемнәр тупланган бердәм дәүләт, куәтле икътисад барлыкка килү үрнәге.

«Бүген иң зур дефицит ул - бөтен дөньяда квалификацияле кадрлар дефициты. Нәкъ менә шуңа күрә Россиядә мәгариф системасындагы үзгәрешләргә, бу өлкәдәге яңалыкларга зур игътибар бирелә. Без үзебезнең эш тәҗрибәсе турында сөйләргә һәм хезмәттәшләребезнең чыгышларын тыңларга бик шат. Безнең өчен үзенчәлек, мөстәкыйльлек, суверенлыкны саклау зур әһәмияткә ия. Бу бөтен дөнья өчен мөһим дип уйлыйм, чөнки без төрле булуыбыз белән көчле», - диде ул «ИТ-парк»та «Киләчәкне формалаштыру» Халыкара мәгариф министрлары форумының пленар утырышында.

Андрей Фурсенко әйтүенчә, кайбер илләр үзләренең мәгариф системасындагы мәсьәләләрне хәл итәсе урынга читтәге белгечләрне үзләренә җәлеп итү белән шөгыльләнә.

«Минем уйлавымча, безнең төп бурыч – яхшы мәгариф системасын һәм сәнәгатьтәге, төрле өлкәләрдәге коллегаларыбыз белән бергә кызыклы эш урыннары булдыру», – дип билгеләп үтте Россия Президенты ярдәмчесе.

• Форумга 31 дустанә ил делегациясе килде. Чарада барлыгы 101 чит илдән вәкил катнаша. Катнашучы илләр арасында Мисыр, Катар, Бразилия, Оман, Сенегал, Мали, Зимбабве, Үзәк Африка Республикасы, Сирия, Гарәп Республикасы, Берләшкән Гарәп Әмирлекләре, Пакистан, Мьянма, Куба, Венесуэла, Беларусь, Әрмәнстан, Кыргызстан, Таҗикстан, Төркмәнстан, Үзбәкстан, Казахстан һ.б. бар.
• Чараны Россия Мәгариф министрлыгы һәм Татарстан Республикасы Хөкүмәте оештыра. Эшлекле программа барышында катнашучылар икътисадны үстерүдә мәгарифнең роле, сыйфатлы белем бирүнең уңайлылыгы, яшьләр белән эшләү, балалар ялы, физик мөмкинлекләре чикле балалар белән эшләү, башка илләрдә рус телен укыту турында фикер алышты. Алар үзләренең уңышлары белән уртаклашты, ике яклы хезмәттәшлекне җайга салу, Россиянең алдынгы мәгариф технологияләрен бәяләп, илебезнең мәдәни мирасы белән танышты.