Шәймиев һәм Тышкы эшләр министрлыгы вәкиле ЮНЕСКО белән хезмәттәшлек турында сөйләште

Бүген Татарстан Республикасы Дәүләт Киңәшчесе, «Яңарыш» республика фондының Попечительләр советы рәисе, ЮНЕСКОның Игелекле ният илчесе Минтимер Шәймиев РФ Тышкы эшләр министрлыгының Күп яклы гуманитар хезмәттәшлек һәм мәдәни элемтәләр департаменты директоры Александр Алимов белән очрашты. Татарстан Республикасы Рәисенең матбугат хезмәте шул турыда хәбәр итә.

Александр Алимов мәгариф министрларының «Киләчәкне формалаштыру» халыкара форумында катнаша, чара шушы көннәрдә Казанда уза.

Минтимер Шәймиев Александр Алимовка тарихи-мәдәни мирасны саклау буенча «Яңарыш» республика фонды эшчәнлеге турында экспозиция тәкъдим итте, Фонд тарафыннан гамәлгә ашырылган Борынгы Болгар шәһәрен һәм Свияжск утрау-шәһәрен торгызу, Болгар ислам академиясен булдыру һәм Казан Изге Ана иконасы соборын торгызу, «Адымнар» күп телле белем бирү комплексларын булдыру буенча проектлар турында сөйләде.

Очрашу барышында Татарстан Республикасының ЮНЕСКО белән хезмәттәшлеген үстерү мәсьәләләре, аерым алганда, «Казан федераль университетының астрономия обсерваторияләре» объектын ЮНЕСКОның Бөтендөнья мирасы исемлегенә кертү турында фикер алыштылар.

Очрашуда РФ Федераль Союз Дәүләт Думасы депутаты Татьяна Ларионова, «Яңарыш» республика фонды башкарма директоры Зөлфия Сөнгатуллина катнашты.

• Күп яклы гуманитар хезмәттәшлек һәм мәдәни элемтәләр департаменты – РФ Тышкы эшләр министрлыгы структурасында яңа бүлекчә, аны булдыру РФ Президенты Владимир Путинның 2022 елның 20 маендагы Указы белән расланган. Департамент эшчәнлеге Россиянең чит илләрдә гуманитар йогынтысын ныгытуга, киңәйтүгә һәм көчәйтүгә, мәдәният, фән, мәгариф, туризм, спорт, яшьләр алмашуы, дөньяда рус телен алга сөрү өлкәләрендә күп яклы һәм халыкара региональ гуманитар хезмәттәшлекне үстерүгә, шул исәптән ЮНЕСКО белән хезмәттәшлекне җайга салуны тәэмин итүгә юнәлдерелгән.