Чиләбе һәм Курган өлкәләре мөфтие Рәсүлев укуларының әһәмияте турында сөйләде

7-8 июльдә Троицкида ХII «Рәсүлев укулары: ислам Россиянең тарихында һәм бүгенге тормышында» Бөтенроссия фәнни-гамәли конференциясе узачак, ул «Традицион конфессияләр Ватан һәм рухи кыйммәтләрне яклау юлында» дигән темага багышлап үткәрелә. Бу хакта Бөтендөнья татар конгрессының матбугат хезмәте хәбәр итә.

Чиләбе һәм Курган өлкәләре мөфтие Ринат хаҗи Раев ни өчен нәкъ менә бу теманың алда торган конференциядә төп тема булачагы хакында сөйләде.

«Россия һәм анда яшәүче халыкларның тарихы – туган илне яклау хакына зур батырлык үрнәге ул. Мөхәммәт пәйгамбәр (с.г.в.с.): «Ватанны яклау – иманның бер өлеше ул», - дигән. Россияне гасырлар дәвамында төрле милләт һәм конфессия вәкилләре саклаган. Әлеге ватанпәрвәрлек традицияләре, туган илгә мәхәббәт бүгенге көндә дә дәвам итә», - дип искәртте Урал федераль округының баш мөфтие, Чиләбе һәм Курган өлкәләре мөселманнары төбәк Диния нәзарәте рәисе Ринат хаҗи Раев.

Искәртеп үтәбез, фәнни-гамәли конференция инде дүртенче тапкыр халыкара дәрәҗәдә узачак. Троицкида оештырылган Рәсүлев укуларында Иордания, Тунис, Марокко, Төркия һәм якын чит ил галимнәре берничә тапкыр кунак булды.

Быел әлеге чарада баш мөфти, шәйхелислам, Россия мөселманнары Үзәк Диния нәзарәте рәисе Тәлгать Сафа Таҗетдин, Бөтендөнья ислам лигасының Россия Федерациясендәге (Мәскәү шәһәре) Тулы вәкаләтле вәкиле Әл-Юссеф Әхмәд Фәйсал, Россиянең төрле төбәкләрендәге мөфтиләр, Болгар ислам академиясе профессоры, Халыкара ислам университетының (Иордания) фән докторы Абдурраззак Абдуррахман Ассаиди һ.б. катнашырга теләк белдерде, диелә хәбәрдә.