Якутия Хөкүмәте «Туполев» гавәми акционерлык җәмгыяте белән килешү төзеде

Бүген Санкт-Петербургта Саха (Якутия) Республикасы Хөкүмәте һәм «Туполев» гавәми акционерлык җәмгыяте  килешү төзеде. Төбәк «Якутия» республика авиакомпаниясе паркын Ту-214 самолетлары белән тулыландырырга ниятли.

«Бүген Петербург халыкара икътисади форумы кырында Саха Республикасы (Якутия) Хөкүмәте һәм «Туполев» ГАҖ (Ростех дәүләт корпорациясенең «ОАК» ГАҖ составына керә) арасында ниятләр турында килешү имзаланды. Килешү төбәкнең транспорт белән тәэмин ителешен арттыру һәм һава транспортын тәэмин итү өчен хезмәттәшлекне үстерүгә юнәлдерелә», дип хәбәр итә Татарстан Рәисенең матбугат хезмәте.

Контрактның детальләре һәм шартлары турында әлегә өстәмә рәвештә фикер алышулар булачак. «Якутия» авиакомпаниясе бәяләвенчә, 2030 елга кадәр аларга Ту-214 типлы 12 очкыч кирәк булырга мөмкин.

Тантанада Татарстан Республикасы Рәисе Рөстәм Миңнеханов катнашты. Аннары Миңнеханов республика башлыгы Айсен Николаев белән очрашты, ул Татарстан Рәисенә Якутиядә Федераль Сабантуй үткәрергә тәкъдим итте, дип хәбәр итә Татарстан Республикасының матбугат хезмәте.

Исегезгә төшерәбез, Миңнеханов, киләчәктә 20гә арттыру мөмкинлеге белән, бер елга 10 данә Ту-214 самолеты җитештерү планы турында хәбәр иткән иде. Дәүләт һәм коммерция заказчыларының ихтыяҗларын тәэмин итү өчен, җитештерүгә берничә партия самолет параллель рәвештә куелачак.