Путин Валентина Терешкованы Гагарин ордены белән бүләкләде
Россия Президенты Владимир Путин Советлар Союзы Герое, СССР очучы-космонавты Валентина Терешкованы Гагарин ордены белән бүләкләде.
«Галәм киңлекләрен үзләштерүдәге күренекле казанышлары, космоска пилотлы тарихи очышны гамәлгә ашыру барышында актив иҗтимагый һәм халыкара эшчәнлек барышында күрсәтелгән батырлык һәм фидакарьлек өчен бүләкләнә», диелә документта.
Валентина Терешкова - дөньяда беренче хатын-кыз-космонавт. Ул 1963 елның 16-19 июнендә Валерий Быковский идарә иткән «Восток-5» корабле белән төркем очышы программасында «Восток-6» космик корабле командиры буларак космик очыш ясаган. Шулай ук ул «Ватан алдындагы казанышлар өчен» орденының тулы кавалеры.
Дәүләт башлыгы Гагарин орденын 2023 елның май ахырында гамәлгә куйды.