Түбән Урысбага авылында балалар өчен «Һәрвакыт булсын кояш!» бәйрәме булды
Яшел Үзән районының Түбән Урысбага авылында балалар өчен «Һәрвакыт булсын кояш!» бәйрәме узды. Бәйрәмдә төрле авыллардан килгән 75ләп бала рәхәтләнеп уйнады, көч сынашты, ярышты, күңел ачты, дип яза «Яшел Үзән» газетасы.
«Шөкер, районыбызда яшь буын арасында диндарлар да шактый. Алар биредә Коръән уку, азан әйтү осталыкларын да күрсәтте. Һәммәсенә афәрин! Азан әйтүчеләр барысы да бүләкләнде. Ә Коръән уку буенча Мамадыш-Әкилдән 7 яшьлек Зәйнәп Сәлахиевага тиңнәр булмады»», – диде Түбән Урысбага җирлеге башлыгы Хәйдәр Сибгатуллин.
Балаларга шундый бәйрәм оештыруга матди ярдәм иткән Равил Гариповка, депутат Илнар Җиһаншинга һәм үзләреннән өлеш керткән калган булышучыларга рәхмәт белдерделәр.
Милли көрәштә батыр булып Сәид Хәйруллин калды һәм аңа тәкә белән акчалата бүләк тапшырылды.
Балалар гер да күтәрү, күзләрен бәйләп кайчы белән бүләк тә кисеп алу уеннарында катнашты, капчык киеп чабыштылар, мәйданда әтәч кудылар, чүлмәк ваттылар. Уен-көлке, бүләкләргә мул бәйрәмдә килгән һәркемне туңдырма белән дә сыйладылар, диелә хәбәрдә.