Миңнеханов: Казан һәм Ульяновск арасындагы хезмәттәшлекне үстерү өчен потенциал югары
Татарстан Рәисе Рөстәм Миңнеханов Ульяновск өлкәсе губернаторы Алексей Русских белән очрашты. «Иннопром - 2023» күргәзмәсендә өлкә стенды янында яклар төбәкләр арасындагы сәүдә-икътисади хезмәттәшлекне үстерү перспективалары хакында фикер алышты. Бу хакта ТР җитәкчесенең матбугат хезмәте хәбәр итә.
Очрашу башланыр алдыннан Миңнеханов һәм Русских төбәкнең сәнәгый потенциалы, шул исәптән «Соллерс-Атлант» шассиендагы ашыгыч ярдәм машинасының функционалы белән танышты.
«Безнең сәүдә-икътисади элемтәләрне үстерү өчен перспективалар яхшы», - дип белдерде Рөстәм Миңнеханов.
Соңгы мәгълүматлар буенча, төбәкләр арасындагы товар әйләнеше 7 миллиард сум тәшкил итә. «Соллерс-Атлант» шассиенда ашыгыч медицина ярдәме автомобильләре җитештерү буенча «Соллерс-Алабуга» һәм «Автодом»ның уртак проекты Татарстан һәм Ульяновск өлкәсе арасындагы уңышлы кооперация үрнәге булып тора.
Алексей Русских, үз чиратында, Татарстан делегациясен бизнес-миссия белән Ульяновск өлкәсенә чакырды. Сүзенең ахырында ул Ульяновскиның Татарстанга елга маршрутлары ачуга карата кызыксындыру белдерүенә игътибар юнәлтте.