М12 трассасында Идел аша салынган күпернең җәяүлеләр өчен каралган өлеше августта ачыла
М12 Мәскәү – Казан трассасында Идел елгасы аша салынган күпернең җәяүлеләр өчен каралган өлеше августта ачыла. Республика транспорт һәм юл хуҗалыгы министры Фәрит Хәнифов алтынчы чакырылыш ТР Дәүләт Советының 45нче утырышында шулай дип белдерде.
«10 августта бер ярдан икенчесенә җәяүлеләр кичүен ачу күздә тотыла», - диде министр.
Татарстанда М12 автомобиль юлының 142 километр озынлыгындагы участогында машиналар хәрәкәтен декабрьдә ачарга ниятлиләр. «Машиналар хәрәкәте ачылачак, объект файдалануга тапшырылачак», - диде Хәнифов.
Татарстанда тиз йөрешле автомагистраль Кайбыч, Апас, Югары Ослан, Лаеш һәм Питрәч районнары аша үтәчәк.
Элегрәк «Татар-информ» агентлыгы Татарстанда М12 трассасында Идел елгасы аша салына торган күпернең 28 терәген төзү эшләре тәмамлануы хакында хәбәр иткән иде.