Болгарда фестиваль кысаларында әзерләнгән театраль эскизлар күрсәтелә башлады
Болгарда “Яңарыш: Эпосның заманча укылышы” фестивале кысаларында уздырылучы иҗади лаборатория бара.
Болгарда “Яңарыш: Эпосның заманча укылышы” фестивале кысаларында уздырылучы иҗади лабораториядә катнашучылар Чыңгыз Айтматовның «Гасырдан озын төн» романы буенча театраль эскизлар өчен өч кисәкне сайлап алганнар. Бүген эскизлар тамашачыга тәкъдим ителде.
Эскизларны яшь режиссерлар - ГИТИС студентлары Янис Брайловский, Арсений Кочедыков, Никита Огарков куйган. Артистлар - кастинг белән сайлап алынган катнашучылар - нигездә ГИТИС һәм Казан театр училищесы студентлары. Эскизларны ГИТИС ректоры Григорий Заславский, ТР мәдәният министры урынбасары Юлия Əдһәмова, «Яңарыш» республика фонды башкарма директоры Зөлфия Сөнгатуллина карады.
«Шушы Болгар җире бүгенге көндә дастаннарның роле турында уйланыр өчен иң кулай урын», диде Григорий Заславский. Ул әле спектакль булмаган эскизларны күрергә килгән тамашачыга рәхмәтләрен җиткерде.
Юлия Əдһәмова Болгар җиренә яңа мәгънәләр алып килгән, яшь энергия белән баеткан яшьләргә рәхмәт әйтте. Театраль лабораторияләрдә 50 студент катнаша. Алар атна дәвамында оештыручылар тәкъдим иткән ике әсәр буенча театраль эскизлар куялар.
Иртәгә тамашачыга Кол Галинең «Кыйссаи Йосыф» әсәре буенча эскизлар күрсәтелә.