Яңа Шәйморза авылында мәчетнең 30 еллыгы һәм ислам дине үзәге ачылу тантанасы булды
29 июльдә Буа районы Яңа Шәйморзада авылдашлар җыелды. Бу көнне мәчетнең 30 еллык юбилее һәм ислам дине үзәге ачылу тантанасы булып узды. Бәйрәмне Рөстәм әфәнде Әхмәдуллин алып барды, дип хәбәр итте Татарстан Диния нәзарәте.
Буа районы имам-мөхтәсибе Илмир хәзрәт Хәсәнов, «Хаҗилар» мәчете имамы Фәһим хәзрәт Сөләйманов, шушы авылда туып үскән Марс Шәрип улы, якын-тирә авыл имамнары, туган туфракны сагынып кайткан авылдашлар җыелды. Беренче эш итеп, иске мәдәният йортын төзекләндергәннән соң, аны Ислам дине үзәге итеп ачу – кызыл тасма кисү булды. Соңра бу бинада тантананың төп өлеше үтте.
Илмир хәзрәт үз чыгышында авыл халкына, аның хәзрәтенә уңышлар теләде. Ислам дине үзәгендә нигезләре сакланмаган авылдашларга нәсел бәйрәмнәрен үткәрергә була дигән фикерне яңгыратты.
Фәһим хәзрәт мәчет салган вакыттагы хәтирәләре белән уртаклашты. Алиев Марс Шәрип улы авыл советы башлыгы Хәсәнов Салават Рифкать улына, авыл халкына рәхмәтләрен җиткерде, хәтирәләре белән уртаклашты. Рифкать хәзрәт Таҗетдинов мәчеткә һәрдаим ярдәм итүчеләргә рәхмәт хатлары тапшырды. Чара мөнәҗәтләр әйтеп дәвам итте, диелә хәбәрдә.