Татарстанда еллык пландагы торакның 81 проценты файдалануга тапшырылган
Татарстанда 2 млн 523 мең кв.метр торак файдалануга тапшырылган – бу еллык планның 81 проценты. Бу хакта Хөкүмәт Йортында узган киңәшмәдә Татарстан төзелеш, архитектура һәм торак-коммуналь хуҗалык министры Марат Айзатуллин хәбәр итте.
Барлыгы 1 млн 46 мең кв.метр мәйданда 130 күпфатирлы йорт файдалануга тапшырылган. Коммерцияле торак төзүчеләр планлаштырылган күрсәткечләрне 73 процентка үтәгән.
Социаль ипотека программасы буенча 33 йорт тапшырылган, бу – планның 75 проценты. Иң югары күрсәткеч шәхси торак төзелешендә – эшләр 90 процентка башкарылган. Әзер йортларның гомуми мәйданы 1 млн 357 мең кв. метр тәшкил итә.
Киңәшмәне Татарстан Республикасы Рәисе Рөстәм Миңнеханов үткәрде. Чарада шулай ук Татарстан Республикасы Премьер-министры Алексей Песошин катнашты.