Киләсе елга кайбер россиялеләрнең эшкә вакытлыча яраксызлык түләве икеләтә артырга мөмкин
2024 елдан башлап эшкә вакытлыча яраксызлык кәгазе буенча максималь түләүләр хәзерге максимум белән чагыштырганда бер ярым тапкыр артачак, ә 2025 елда алар хәзергегә караганда ике тапкыр зуррак булачак. Бу хакта Россиянең атказанган юристы Иван Соловьев сөйләде, дип яза «Труд».
«2024 елда эшкә вакытлыча яраксызлык кәгазе буенча түләүләр күләме бер көнгә 4 100 сумнан артып китәчәк, ә 2025 елда — 5 674 сум. (...) Бу исә кешеләргә дәвалану һәм терелеп бетү өчен нормаль шартлар тудырачак», — ди ул, боларның социаль түләүләр түгеллеген ачыклап.
Юрист сүзләренчә, бу түләүләр шулай ук предприятиенең хезмәт хакы фондына кагылмаячак. Эш бирүче вакытлыча эшкә яраксызлык вакытының беренче өч көне өчен генә түләячәк, калганнары — Социаль фонд исәбеннән.
Ул билгеләп үткәнчә, әгәр хезмәткәрнең сигез һәм аннан да күбрәк еллык иминият стажы булса, ул эшкә вакытлыча яраксызлык кәгазе белән тулы хезмәт хакы алачак. Шулай да, ул максималь планкадан артык була алмый. 2023 елда ул көненә 2737 сум тәшкил итә.