Актаныш районында төлкеләр санын көйләү буенча эш алып барыла
Актаныш районында кыргый хайваннар санын көйләү буенча эш алып барыла. Агымдагы елның 10 аенда Актаныш районында 153 төлкене атканнар. Бу хакта Актаныш муниципаль районы матбугат хезмәте хәбәр итә.
Районның аучылык хуҗалыгы рәисе Ильяс Галләмов сүзләренчә, ел башыннан быел 153 төлке атылган. Шуның 50дән артыгы - октябрь аенда.
«Мал-мөлкәткә зыян салган бу хәйләкәрләрне күрсәгез, кичекмәстән җирлек башлыгына мөрәҗәгать итәргә кирәк. Билгеле, авыл урамында, шәхси йортлар арасында ату тыела. Ә төлкеләрнең күбесе, кызганыч, ташландык, агач баскан ихаталарда, «күршедә» генә яшәп ята», диелгән хәбәрдә.