Монополиягә каршы федераль хезмәт йомыркага бәя арту белән кызыксына башлаган
Монополиягә каршы федераль хезмәт (ФАС) тавык йомыркасына бәя кую механизмын тикшерергә җыена. Бу хакта ведомствоның Telegram каналында хәбәр ителә.
Монополиягә каршы федераль хезмәтнең территориаль органнары җитештерүче компанияләргә тавык йомыркасына бәя формалаштыру турында сорауларын җибәргән инде. Алынган мәгълүматларга нигезләнеп, федераль хезмәт күпләп сату бәясен билгеләүнең нигезлелеген анализлаячак. Төбәкләрдә әлеге эш башланган инде.
Моннан тыш, монополиягә каршы федераль хезмәт «тавык йомыркаларын сатып алу һәм ваклап сатуга уртача бәянең атналык динамикасы турында» мәгълүмат бирү өчен ун федераль сәүдә челтәренә сорау җибәргән.
Федераль дәүләт статистикасы хезмәтенең Татарстан буенча территориаль органы мәгълүматларына караганда, республикада 23-30 октябрь аралыгында тавык йомыркасы 3,31 процентка артып, 84,24 сумга кадәр кыйммәтләнгән. Аның бәясе башка продуктларга караганда сизелерлек үскән.
Элегрәк «Татар-информ» хәбәр иткәнчә, Россия Президенты Владимир Путин кош итенең кыйммәтләнүенә гаҗәпләнгән һәм кирәк икән, тавык итен Белоруссия һәм Казахстаннан импортларга тәкъдим иткән иде.