Шәйхразыев: Быел «Татарстанның эшлекле хезмәттәшләре» форумы халыкара статуска ия булды
Васил Шәйхразыев үз чыгышында хәйриячелеккә зур игътибар юнәлтте.
Бөтендөнья татар конгрессының Милли шура рәисе Васил Шәйхразыев XVI «Татарстанның эшлекле хезмәттәшләре» форумы быел халыкара статуска ия булуын белдерде.
«XVI «Татарстанның эшлекле хезмәттәшләре» форумы башка еллардагылардан эчтәлеге белән дә, катнашучылар составы белән дә аерыла. Ул хәзер халыкара статуска ия булды. Монда татарлар гына түгел, башка милләт вәкилләре дә катнаша. Татарлар ничек эшләгәнен, Россиядә бизнес ничек корылганын күрсәтер өчен бу мөһим», – диде Васил Шәйхразыев форумны ачу тантанасында.
Васил Шәйхразыев сүзләренчә, форум эшмәкәрләргә бер-берсе белән очрашу, аралашу мөмкинлеге бирә. Кунакханәдә торган арада гына да яңа хезмәттәшләр табарга мөмкин. Форум пленар утырышлар белән генә чикләнми. Көннең беренче яртысында форум делегатлары авыл хуҗалыгы, ИТ-технологияләр, химия сәнәгате юнәлешләре буенча предприятиеләргә барды.
Көннең икенче яртысында кунаклар «Корстон» сәүдә-күңел ачу комплексында Татарстан эшмәкәрләре белән очрашты. Алар төрле секцияләргә бүленеп авыл хуҗалыгы һәм терлекчелек, сәнәгать, металлургия, машина төзелеше, сәүдә, хезмәт күрсәтү өлкәсе, төзелеш, күчемсез милек һәм торак-коммуналь хезмәт тармаклары буенча фикер алышты. Заллардагы урыннар эшмәкәрләргә күзгә-күз сөйләшү өчен махсус җайланган иде.
Васил Шәйхразыев үз чыгышында хәйриячелеккә зур игътибар юнәлтте. «Тарихка күз салсак, татар байлары мәчетләр, мәдрәсәләр, хастаханәләр төзеткән. Йөз елдан артык вакыт үтсә дә, алар салдырган биналарга карап һаман да сокланабыз. Теләсә кайсы төбәктә татарлар калдырган эз белән горурланырга була», – диде ул.
1990нчы елларда эшмәкәрләр мәчетләр салу, хәйриячелек традициясен кабат торгызды. «Бүген Татарстанда гына 1580 мәчет эшли, һәммәсендә имам бар. Әгәр сез мәчетләргә, татар мохитен булдыручыларга, мәктәпләргә, татар милли-мәдәни автономияләргә ярдәм итсәгез, без бик рәхмәтле булырбыз. Хәйрия ярдәмегез үзегезгә үк бәрәкәт китерер, – дип мөрәҗәгать итте Васил Шәйхразыев форумда катнашучы эшмәкәрләргә.
Бүген Казанда XVI «Татарстанның эшлекле хезмәттәшләре» форумының икенче көне узды. Форумда Россия Федерациясенең 48 төбәгеннән һәм 14 чит илдән 300гә якын эре эшмәкәр катнашты.