Татарстан Рәисе Диния нәзарәтенең «Зәкят» хәйрия фондына рәхмәт белдерде
28 ноябрьдә Казанда «Татарстанның эшлекле хезмәттәшләре» XVI форумының пленар утырышы узды. Чараны Бөтендөнья татар конгрессы ТР Сәүдә-сәнәгать палатасы белән берлектә оештырды.
Форумда Россиянең 40тан артык төбәгеннән, якын һәм ерак чит илләрдән 350гә якын татар эшмәкәре катнашты.
Форумның пленар утырышы кысаларында Татарстан Рәисе Рөстәм Миңнеханов дәүләт бүләкләрен тапшырды.
Рөстәм Нургали улы Миңнеханов ТР мөселманнары Диния нәзарәтенең «Зәкят» хәйрия фондын рәхмәт сүзе белән бүләкләде. Фонд әлеге бүләкне лаеклы рәвештә алды: ел саен йөзләгән авыру балалар биредә дәвалану өчен ярдәм ала, меңләгән аз керемле гаиләләр финанс һәм азык-төлек ярдәме таба.
«Зәкят» фонды хаклы рәвештә Татарстанда иң зур һәм иң ышанычлы хәйрия фондларының берсе булып санала, ди белдерә ТР Диния нәзарәте матбугат хезмәте.