Эльмира Зарипова: Татарстанда ун ел эчендә күп балалы гаиләләр саны ике тапкыр артты
Татарстанда ун ел эчендә күп балалы гаиләләр саны ике тапкыр артып, 50 меңгә җитте. Хәзерге вакытта республиканың күп балалы гаиләләрендә 160 мең бала яши. Бүген ТР хезмәт, халыкны эш белән тәэмин итү һәм социаль яклау министры Эльмира Зарипова #ТатарстанОнлайн программасы туры эфирында шул хакта хәбәр итте.
Спикер белдергәнчә, бу – илебездә РФ Президенты Владимир Путин күрсәтмәсе белән гамәлгә ашырыла торган «Демография» илкүләм проектының уңай нәтиҗәсе. Бу турыда «Татар-информ» хәбәрчесе Наталья Рыбакова яза.
«Узган ел гына да Социаль фонд линиясе буенча ярдәм чараларына – 13 миллиард сумнан артык, ә безнең министрлык линиясе буенча 25 миллиард сумга якын акча бүленде», - дип искәртте Зарипова.
Аның сүзләренчә, соңгы елларда «балалар бюджеты» - балалы гаиләләргә ярдәм итүгә юнәлдерелгән акча – дигән төшенчә барлыкка килде. Бу социаль ярдәм чаралары гына түгел, ә бушлай кружкалар, мәктәптә туклану, җәйге лагерьларда ял итү һәм шифаханә-курортларда дәвалану да.