Сайлаучы беләзеге була торып, кондуктор түләү сораса, кая мөрәҗәгать итәсен аңлаттылар
Сайлаучыларга бирелә торган беләзек була торып, Казан җәмәгать транспортында кондуктор юл йөрү өчен түләүне сораса, 223-26-30 телефоны буенча Транспорт комитетына мөрәҗәгать итәргә кирәк.
Бу хакта «Татар-информ» мәгълүмат агентлыгында узган матбугат очрашуында Татарстан премьер-министры урынбасары Ләйлә Фазлыева хәбәр итте.
Исегезгә төшерәбез, әлеге беләзек республика башкаласында җәмәгать транспортында бушлай йөрү хокукын бирә.
«Казан сайлау кампаниясен оештыручылар, аппарат җитәкчеләре бар. Әгәр маршрутларда хокук бозулар турында мәгълүмат бар икән, хәбәр итүегезне сорыйм, без эшләрбез», — дип ышандырды Фазлыева.
- Сигезенче тапкыр РФ Президентын сайлаулар 15, 16 һәм 17 мартта узачак. Сайлауларга дүрт кандидат: Владислав Даванков (»Яңа кешеләр» партиясеннән), Леонид Слуцкий (ЛДПР партиясеннән), Николай Харитонов (КПРФ партиясеннән) һәм гамәлдәге дәүләт башлыгы Владимир Путин (үз-үзен тәкъдим итүче буларак) кертелгән.