ТР Үзәк сайлау комиссиясе рәисе кайнар элемтәгә сайлау буенча сораулар күп килүен әйтте
Россия Президентын сайлауларның беренче көнендә ТР Үзәк сайлау комиссиясе кайнар элемтәсе 800 дән артык шалтырату кабул иткән. Бу хакта «Татмедиа»да Россия Президентын сайлауның бердәм мәгълүмат үзәгендә Татарстан Үзәк сайлау комиссиясе рәисе Андрей Кондратьев әйтте.
«Кичә 815 шалтырату булган. Күптән андый сан булганы юк иде. Бүген иртәнге унга кадәр кичә килгән сорауларга җавап бирдек. Торак-коммуналь хезмәтләре, транспорт, шулай ук теркәлергә өлгермәү буенча сораулар килде. Без һәр сорауга җавап бирдек, бер сорау да җавапсыз калмады. Бүген 105 шалтырату кабул иттек. Сайлаучылар кирәк булган бөтен мәгълүматны да белделәр. Кичкә бүгенге сорауларга да оператив җавап бирергә тырышабыз», – диде ТР Үзәк сайлау комиссиясе рәисе.
- 16 март 15.00 сәгатькә Татарстан халкының 54,5 проценты – 1 миллион 596 мең 415 кеше Россия Президенты сайлауларында тавыш биргән.