«Гаилә белән сайлыйбыз» марафонында өченче Lada Vesta автомобилен уйнаттылар

Бүген кичке сигездә, ТНВда «Гаилә белән сайлыйбыз» телемарафоны туры эфирында өченче Lada Vesta автомобилен уйнаттылар. Гаилә елы уңаеннан уздырылган фотобәйге нәтиҗәләрен Артур Кортес әйтте.

«Барлыгы өч машина уйнатылды. Фотобәйгедә катнашу өчен 15 марттан 17 мартка кадәр Татарстанда сайлаучыларга бирелгән беләзек белән үзеңнең сайлау участогы янында фотога төшәргә, бу фотоны #ТатарстанАлга һәм #ВсейСемьейНаВыборы хештеглары белән социаль челтәрдәге үз битеңә урнаштырырга кирәк иде», – дип искәртте Артур Кортес.

Бүгенге уенда 24 меңнән күбрәк катнашучы булган, ә өч көн эчендә барлыгы 71 мең сайлаучы катнашкан. Өченче җиңүче онлайн-режимда очраклы саннар генераторы ярдәмендә ачыкланган.

Өченче машинаны Эльвира Митрофанова отты. Ул ире белән бергә сайлау участогы янында төшкән фото урнаштырган.

Искәртеп үтик, бүген көндез телемарафонда «Гаилә белән сайлыйбыз» бәйгесендә җиңүчеләргә ике Lada Vesta автомобиле ачкычларын тапшырганнар иде инде.

Актаныш районында яшәүче Гардисламовлар гаиләсе машинаны сайлауларның беренче көнендә отты. Флүдә Гардисламова – Татар Ямалысы мәктәбендә укытучы булып эшли. Ире Алмаз – янгын сүндерү хезмәте эшчесе. Алар истәлеккә фотога төшеп, шуны социаль челтәргә куйган.

Республиканың Лаеш районында яшәүче Хөснетдиновлар гаиләсе икенче көнне, 16 мартта машина отты. Алинә Хөснетдинова «Гаилә белән сайлыйбыз» беләзеге белән сайлау участогы янында төшерелгән гаилә фотосын социаль челтәрдәге битенә куя. Гаилә Лаеш районының Усады бистәсендә яши, 2 яшьлек кыз тәрбиялиләр, Алинә декретта, ә ире үзмәшгуль.

«Гаилә белән сайлыйбыз» марафоны кичке унга кадәр дәвам итә. 100дән артык кеше – республиканың танылган гаиләләре, медиаперсоналар, татар эстрадасы йолдызлары һәм аларның туганнары катнашыр дип көтелә.

Тамашачылар туры эфирда «Ак Барс Арена»дагы чараларны күрә алачак. Хабиб, «Иванушки International», «Хор Турецкого», «Кар-мэн» музыкаль коллективлары һәм Ваня Дмитриенко концертның хедлайнерлары була.

Россия Президентын сигезенче тапкыр сайлаулар 16 һәм 17 мартта дәвам итә. Аларда дүрт кандидат Владислав Даванков («Яңа кешеләр» партиясеннән), Леонид Слуцкий (ЛДПР партиясеннән), Николай Харитонов (КПРФ партиясеннән) һәм хәзер дәүләт башлыгы булган Владимир Путин (үз-үзен тәкъдим итүче буларак) катнаша.

Татарстанда сайлау хокукы булган 3 миллион кеше яши. Сайлаулар уздыруны сайлау комиссиясеннән 22 мең кеше тәэмин итә. Сайлау участокларында 16 меңнән күбрәк күзәтүче, шул исәптән чит ил күзәтүчеләре дә эшли. Республикада 65 территориаль һәм 2722 участок сайлау комиссиясе эшли, шулай ук хастаханәләрдә, шифаханәләрдә, СИЗОларда, вокзалда һәм аэропортта вакытлыча 45 сайлау участогы ачылды. Бүген, тавыш бирүнең ахыргы көнендә республикада сайлау участоклары 20:00гә кадәр эшләде. Сайлауларны уздыруны 22 мең сайлау комиссиясе әгъзалары тәэмин итте.