Сиднейда Нәүрүз бәйрәмен билгеләп үттеләр
Австралиянең Сидней шәһәрендә Нәүрүз бәйрәмен билгеләп үттеләр. Бу хакта Бөтендөнья татар конгрессының матбугат хезмәте хәбәр итә.
Австралиянең Яңа Көньяк Уэльс Татар мирасы ассоциациясе Powerhouse Museum чакыруы буенча бәйрәм хөрмәтенә Парамматта Таун Холда австралиялеләр өчен махсус программа белән чыгыш ясады. Ассоциация җитәкчесе Лилия Сәмигуллина татарлар турында сөйләде һәм «Татар мәдәниятендә Нәүрүз бәйрәменең әһәмияте» дигән темага презентация тәкъдим итте.
«Ассоциация әгъзалары, якташларыбыз һәм ватандашларыбыз, иҗади номерлар белән чыгыш ясады. Залда утыручылар татар мәдәнияте һәм традицияләре турында чыгышларны кызыксынып тыңлады һәм барлык чыгыш ясаучыларны алкышларга күмде. Безгә теләктәшлек күрсәтергә килгән ватандашларыбыз һәм якташларыбызга рәхмәтле булып калдык. Башка халыкларның гореф-гадәтләре белән танышу бик кызык булды. Иранлылар, уйгырлар, әфганнар, казахлар тәкъдим иткән программаларны сокланып карадык. Безнең оешмада элеккеге союзның төрле илләреннән вәкилләр бар һәм Нәүрүз – күпләрнең яраткан бәйрәме.
Без Австралия халкын татар мәдәнияте, иҗаты һәм илебезнең тарихы белән таныштыру мөмкинлеге тудырылган өчен рәхмәтле», - диде Лилия Сәмигуллина.