Валентина Матвиенко Россия Хөкүмәтенең яңа составында кадрлар үзгәреше турында сөйләде
Россия Хөкүмәтенең яңа составында кадрлар үзгәреше булырга мөмкин, әмма нигезе элеккечә калачак. Федерация Советы спикеры Валентина Матвиенко РИА Новости агентлыгына интервьюда шул хакта сөйләде.
Мартта узган ил Президентын сайлауда гамәлдәге дәүләт башлыгы Владимир Путин җиңде. Закон нигезендә Министрлар Кабинеты яңадан сайланган Президент инаугурациясе көнендә вәкаләтләрен өстеннән төшерә, шуннан соң яңа Министрлар Кабинетын формалаштыру процедурасы үткәрелә. Конституциянең яңа нормалары Дәүләт Думасы тарафыннан Хөкүмәт Рәисен, аның урынбасарларын һәм министрларын раслауны күздә тота, дәүләт башлыгы эчке эшләр, гадәттән тыш хәлләр, тышкы эшләр, саклану, юстиция министрларын Федерация Советы белән киңәшкәннән соң билгеләячәк.
«Кадрлар үзгәрешенә килгәндә, алар булырга мөмкин, әмма тулаем алганда, Министрлар Кабинетының нигезе, һичшиксез, калачак һәм тотрыклы эшләрен дәвам итәчәк», - дип искәртте Матвиенко.
Аның сүзләренчә, Федерация Советы Хөкүмәтнең хәзерге составы эшен уңай бәяли.
«Махсус хәрби операция башлангач, бернинди каушап калу да булмады, хәрбиләрне безнең ышанычлы җиңү өчен кирәкле бөтен әйберләр белән тәэмин итү буенча системалы һәм планлы эш алып барылды», - диде Матвиенко һәм монда Премьер-министр Михаил Мишустинның хезмәте зур булуын билгеләп үтте.
Ул шулай ук Министрлар Кабинетының РФ Президенты Владимир Путинның турыдан-туры, даими җитәкчелеге һәм контролендә эшләвен искәртте.