Россия халкын май бәйрәмнәрендә алдауның яңа төрләре турында кисәттеләр

Май бәйрәмнәре алдыннан «Почта банкы» экспертлары гражданнарны алдау өчен төрле ысуллар куллана алган мошенникларның активлыгы артуы турында кисәтә, дип хәбәр итә РИА Новости.

Киң таралган хәйләләр арасында Җиңү көненә ветераннарга түләү вәгъдәләре һәм «Үлемсез полк» акциясендә катнашу өчен түләү таләпләре бар. Шулай ук явыз ниятле кешеләр махсус шартларда кертемнәр ачуны яки югары табыш вәгъдәсе белән акчаны инвестицияләүне тәкъдим итә алалар.

Мошенниклар еш кына, имеш операцияләрне раслау өчен дип, банк картасы һәм СМС-код мәгълүматларын бирүне сорыйлар. Шулай ук кушымталар урнаштырырга кушалар, бу исә аларга мобиль банкка керү һәм счеттан барлык акчаларны алу мөмкинлеге бирә. Шуны истә тоту мөһим: «Үлемсез полк»та катнашу бушлай һәм быел ул онлайн уза.

Моннан тыш, мошенниклар булган хисапларны ябуны яки кредит рәсмиләштерүне таләп итә торган «файдалы» инвестиция схемаларын тәкъдим итәргә мөмкиннәр, шуннан соң акчаларны «транзит» счетына күчерергә кушалар. Шулай ук сим-картаны яңадан рәсмиләштерү тәкъдимнәреннән һәм мәгълүмат чыгуы яки дәүләт хезмәтләре сайтларын «вату» турындагы хәбәрләрдән сакланыгыз.

Банк экспертлары, шикләнгән очракта кичекмәстән аралашуны туктатырга, мәгълүматны раслау һәм үз акчаларыгызны саклау өчен банк картасында яки мобиль оператор сайтында күрсәтелгән рәсми номерлар буенча шалтыратырга киңәш итә. Уяу булыгыз һәм мошенникларның хәйләләренә бирешмәгез, диелә хәбәрдә.