Ульяновскида өлкә Сабантуена әзерләнәләр
2024 елның 23 июнендә Ульяновск шәһәре «Җиңү» мәдәният һәм ял паркы һәм Шәһәр ипподромы территориясендә «Сабантуй» өлкә татар милли бәйрәме узачак. Бу хакта Бөтендөнья татар конгрессы хәбәр итә.
Ульяновск өлкәсендә «Сабантуй» инде 34 тапкыр киң һәм масштаблы уза.
Россиядә «Гаилә елы»н бәйрәм итү кысаларында «Сабантуй»да Үзәк мәйданчыкта күп балалы һәм 50, 55, 60, 65 ел яшәгән гаиләләрне хөрмәтләү булачак, диелә хәбәрдә.
Бәйрәмдә кунакларны кызыклы программа көтә: Ульяновск шәһәре, Ульяновск өлкәсе сәнгать эшчәнлеге катнашучылары һәм Татарстан Республикасы сәнгать осталары концерты, күңелле конкурслар һәм уеннар, ярышлар, ат чабышы, «Көрәш» татар милли көрәше. Теләге булганнар милли сувенирлар, халык сәнгать кәсепләре эшләнмәләре, тәм-томнар һәм камыр ризыклары сатып ала, татар чәк-чәге белән сыйлана алачак.
Өлкә Сабантуе партнеры – Татарстан Республикасының Баулы муниципаль районы Сабантуй кунаклары өчен «Сабантуй – дуслык һәм тынычлык бәйрәме» вокаль-хореографик композиция әзерли.
Шулай ук программада мәдәният, мәгариф хезмәткәрләрен, күп балалы гаиләләрне, язгы чәчү нәтиҗәләре буенча агросәнәгать комплексы һәм муниципаль берәмлекләр хезмәткәрләрен хөрмәтләү була. «Иң яхшы милли ишегалды» смотр-конкурсы үткәрелә. «Мәктәпкә җыенырга ярдәм ит» акциясе кысаларында бүләкләү дә була.
Ипподром территориясендә массакүләм күңел ачуда катнашучыларны «Татар утары» импровизацияләнгән татар ишегаллары каршы алачак. Анда үрелгән койма артында чын ишегалды корылмалары һәм милли ашлар белән агач татар йортлары тәкъдим ителәчәк. Биредә һәркем татар сыйларын авыз итә алачак.
Ульяновск өлкәсеннән 200гә якын артист чыгыш ясаячак. Татарстан Республикасыннан 200 артист һәм спортчы киләчәк, диелә хәбәрдә.