KazanForum 2024 кунаклары дөньяның 13 иленең ризыкларын татып карый алачак
18-19 майда KazanForum 2024 кысаларында Юныс Әхмәтҗанов исемендәге яшь аш-су осталары турниры узачак. Анда дөньяның 13 иленнән 100дән артык белгеч катнаша. Аның үзенчәлеге шунда ки, ризыкларны теләгән һәркем татып карый алачак. Бу хакта «Татар-информ»да узган матбугат конференциясендә Татарстан рестораторлары һәм отельерлары ассоциациясе президенты Зөфәр Гаязов хәбәр итте.
«Без инде җиде ел Әхмәтҗанов исемендәге аш-су осталары конкурсын үткәрәбез. Быел ул халыкара булды. Татарстан Россияне тәкъдим итәчәк. Форум ислам дөньясына багышланган, шуңа күрә татар аш-суы да тәкъдим ителәчәк. Без инде катнашучылар ярышачак сигез профессиональ бокс әзерләдек», — дип өстәде спикер.
Турнир һәркем өчен ачык булачак. Теләге булган һәркем мәйданчыкта дөньяның төрле халыкларының ашларын татып карый ала. Алар арасында - Малайзия, Россия, Сенегал, Тунис, Алжир, Марокко һәм башкалар, дип аңлатты ТР Рестораторлар һәм отельерлар ассоциациясе идарәсе рәисе Михаил Шәрипов.
«Конкурс географиясе бик киң, без моңа бик шат. Без мөрәҗәгать иткән барлык илләрнең дә безнең вакыйгага зур кызыксыну белән җавап бирүләре сөендерә. Бу конкурс ризыкларын хөкемдарлар гына түгел, ә теләгән һәркем татып карарга мөмкин булган бердәнбер турнир», — диде ул.
Ярышларның баш хөкемдары Азәрбайҗанның кулинар ассоциациясе президенты, Бөтендөнья ислам кулинар җәмгыяте президенты, WACSның мактаулы әгъзасы Таһир Әмирасланов булачак. Ул турнирның уникальлеген билгеләп үтте һәм Татарстанның мондый турнирларны оештыру тәҗрибәсен башка илләргә дә таратырга кирәклегенә ышаныч белдерде.