Теләче районында педагогия хезмәткәрләре милли мәгариф турында фикер алышкан
Теләче районында Татарстан Республикасы педагогия хезмәткәрләренең киңәшмәсенең милли мәгариф секциясе утырышы булган. Ул «Күп мәдәниятле мохиттә туган телләр: укыту һәм тәрбия бирүдә заманча стратегия һәм технологияләр» темасына багышланган.
«Кунаклар эшчәнлекне Теләче урта мәктәбеннән башлады. Бу көнне мәктәп биләмәсе Сабантуй кебек кайнап торды. Бер урында милли киемнәрдән кызлар, малайлар Сабантуй күренешләрен күрсәтте. Кемдер йомырка кабып йөгерде, капчык киеп сикерде, бил алыштылар. Танылган аш-су остасы, якташыбыз Юныс Әхмәтҗанов багышлап махсус проект эшләнде – милли ризыклардан өстәлләр сыгылып тора иде. Теләче урта мәктәбе укучылары технология дәресендә үзләре уйлап тапкан эш җайланмалары, токмач кисү һәм башка тормыш өчен кирәкле җиһазлар белән таныштырды», - диде «Татар-информ»га «Теләче информ» мәгълүмат үзәге хәбәрчесе Эльмира Котдусова.
Аның әйтүенчә, Теләче урта мәктәбе укучылары мәгариф хезмәткәрләренә махсус хәрби операциядә катнашкан якташларына ярдәм итүләре турында сөйләгән. «Кече яшьтән укучыларга милли тәрбия, белем бирелгәнлеге ачык күренде. Теләче районының эш тәҗрибәсен, методик мәйданчыкларын күреп, мөгаллимнәр үзләрендә дә кулланырга исәп тотып, дәфтәрләренә теркәп барды. Аннары кунаклар Теләче урта мәктәбендә укучылар, мөгаллимнәр белән аралашты. Укучыларның җыр, биюгә, спортка булган сәләтләрен дә күрделәр», - диде ул.
«Татар теле һәм әдәбияты укытучылары ассоциациясе бүлекчәләре җитәкчеләре фикер алышты. Татарстан Республикасы муниципаль берәмлекләренең милли мәгариф өчен җаваплы методистлары «Киләчәк» яшьләр үзәгендәге педагогларның эшчәнлеге белән танышып, мастер-классларда катнашты. «Техник иҗат» уеннарны программалаштыру, роботлар җыю, видеостудия, сынлы сәнгать дәресләрендә кызларның матур мендәр тегүләре бары соклану гына уятты», - диде «Теләче информ» хәбәрчесе.
Татарстан Республикасы Мәгариф һәм фән министрлыгының милли мәгариф идарәсе җитәкчесе, филология фәннәре кандидаты Илгиз Халиков мәгариф системасында эшләүчеләргә рәхмәт сүзләрен әйткән. Татарстан Республикасы Мәгарифне үстерү институтының татар теле һәм әдәбияты кафедрасы мөдире, филология фәннәре кандидаты Рәсимә Шәмсетдинова белем бирү процессының аерылгысыз өлеше буларак өй эшләре хакында сөйләгән.
Республиканың мәгарифне үстерү институтының мәктәпкәчә һәм башлангыч белем кафедрасы доценты Зөлфирә Җамалетдинова яңартылган федераль дәүләт белем бирү стандартлары һәм федераль белем бирү программалары нигезендә дәрестән тыш эшчәнлек оештыруның үзенчәлекләре белән таныштырган. Теләчедә мәгариф бүлегенең милли мәгариф өчен җаваплы методисты Гөлфинә Сәхәбиева милли мәгариф юнәлешендә гамәлгә ашырыла торган нәтиҗәле заманча проектлар белән чыгыш ясаган.
«Очрашу вакытында милли мәгарифне үстерү буенча актуаль булган темаларны уртага салып сөйләштеләр. Соңыннан, районда Татарстан Республикасы Мәгариф һәм фән хезмәткәрләренең республика киңәшмәсе булды. Мәгариф хезмәткәрләренең көне буе дәвам иткән традицион киңәшмәсе район мәдәният йортында пленар утырыш белән тәмамланды. Ул «Күп мәдәниятле мохиттә туган телләр: укыту һәм тәрбия бирүдә заманча стратегия һәм технологияләр» исеме белән үтте», - диде Эльмира Котдусова.
Пленар утырышта Теләче районы башлыгы Нәҗип Хаҗипов, Татарстан Республикасы мәгариф һәм фән министры урынбасары Минзәлия Закирова, Россия Дәүләт Думасы депутаты Илдар Гыйльметдинов катнашкан. «Минзәлия Закирова Теләче районында мәгариф эшчәнлеген уңай бәяләде, киңәшләрен әйтте. Чара хезмәт алдынгыларына бүләкләр тапшыру белән төгәлләнде», - диде ул.