Рөстәм Миңнеханов Татарстан бизнесы вәкилләре белән очрашачак
24-26 майда Татарстанда Россия эшкуарлыгы көненә багышланган чаралар узачак. Алар Казан һәм Яшел Үзәндә үткәреләчәк. Эшкуарларны һөнәри бәйрәмнәре белән Татарстан Республикасы Рәисе Рөстәм Миңнеханов котлаячак – ул республика бизнесы вәкилләре белән очрашачак.
Бу көннәрдә Татарстан башкаласында Камал театры янында «Мин – ул Татарстан» ( «Я и есть Татарстан») бренды астында Татарстан үзмәшгульләре эшләнмәләрен сату күргәзмәсе ачыла. Бөтен республикадан 120 экспонент үз продукциясен тәкъдим итә, дип хәбәр итә ТР Икътисад министрлыгы. Күргәзмә кунаклары җирле җитештерүчеләрнең продукциясен сатып ала, артистлар, музыкантлар чыгышларын карый, төрле конкурсларда катнаша ала.
Күргәзмәне ачу тантанасы 24 майда 18 сәгатькә планлаштырылган.
Шул ук көнне Яшел Үзәндә «Искра-Волга» технопаркында эшлекле программа старт ала. Анда Рөстәм Миңнеханов катнашачак. Ул шулай ук республиканың бизнес-берләшмәсе вәкилләре белән очраша.
Чара «Кече һәм урта эшкуарлык һәм шәхси эшкуарлык инициативасына ярдәм» илкүләм проектын гамәлгә ашыру кысаларында уза.
- Россия эшкуарлыгы көне Россиядә ел саен 26 майда билгеләп үтелә. Һөнәри бәйрәм РФ Президенты Владимир Путин указы белән 2007 елның 18 октябрендә билгеләнде.