Киров өлкәсе «Бөтенроссия Сабантуе-2025» программасын 1 июньгә әзерләячәк
2025 елда Киров Бөтенроссия авыл Сабантуен уздыру урыны булачак. Бәйрәм программасы агымдагы елның 1 июненә кадәр әзерләнә, дип хәбәр итә Киров өлкәсе Хөкүмәте.
Төбәк губернаторы Александр Соколов өлкәдә Татарстан белән яхшы күрше мөнәсәбәтләре урнашканлыгын искәртә. Ул киләчәктә ике субъект арасындагы мөнәсәбәтләр яңа проектлар белән тулыланыр дип өметләнүен белдерде.
«Бу бәйрәм язгы-җәйге кыр эшләренең тәмамлануын символлаштыра, димәк, бу бәйрәм хезмәт кешеләрен, төрле дин кешеләрен һәм этник төркемнәрне берләштерә. Татарстан Республикасы белән яхшы күрше мөнәсәбәтләре урнашты, алар якын елларда яңа уртак эшләр белән ныгыр дип өметләнәм», — дип белдерде Соколов.
Бөтенроссия Сабантуен уздыру турындагы килешүгә Татарстан Рәисе Рөстәм Миңнеханов һәм Киров өлкәсе губернаторы арасында 2023 елда ук ирешелгән иде.
Хәзерге вакытта әлеге чарага әзерлек һәм аны үткәрү буенча оештыру комитеты эшли башлады. Аны Киров өлкәсе губернаторы Александр Соколов җитәкли.