Казанлылар бушлай медицина тикшерүен уза алачак
Казанның сәүдә үзәкләренең берсендә шимбә, 22 июньдә, бушлай күчмә медицина тикшерүе оештырыла. Акция авыруларны башлангыч стадиясендә һәм аларның үсеш факторларын ачыклау өчен «Сәламәтлекне саклау» милли проекты кысаларында уздырыла. Бу хакта Казан мэриясе матбугат хезмәте хәбәр итә.
Табиблар анкеталау үткәрәчәк, тән массасы индексын билгелиячәк, электрокардиограмма ясаячаклар, кандагы кислород дәрәҗәсен һәм эчке басым дәрәҗәсен үлчиячәкләр. Шулай ук казанлылар кан анализы нәтиҗәләрен дә ала алачак. Теләгән кешеләрнең барысын да 20 нче шәһәр поликлиникасы терапевты тикшерәчәк.
Шәһәр халкын 10:00 нан 17:00 сәгатькә кадәр Җиңү проспекты, 91 адресы буенча урнашкан сәүдә үзәгенең беренче катында көтәчәкләр. Үзең белән паспортны алырга кирәк, дип хәбәр иттеләр Татарстан Республикасы Сәламәтлек саклау министрлыгының Казан буенча идарәсендә.