Иртәгә Татарстанда яңгыр һәм көчле җил көтелә
Бүген, 23 июньдә, һәм иртәгә, 24 июньдә, Татарстанда кабат һава торышы шартлары начарая. Бу хакта ТР Гидрометеорология үзәге кисәтә.
Якшәмбе кич, дүшәмбе көндез һәм төнлә республикада урыны белән көчле җил көтелә. Җилнең тизлеге секундына 15-18 метрга кадәр җитәчәк. Төнге сәгатьләрдә төбәктә көчле яңгыр явачак.
Шул ук вакытта Казанда 24 июньдә тәүлекнең якты вакытында секундына 15-18 метрга кадәр тизлек белән исүче көчле җил көтелә.
Бофорт шкаласы буенча, секундына 13,9 метрдан 17,1 метрга кадәр тизлек белән исүче җил көчле, ә 17,2 метрдан 20,7 метрга кадәр тизлек белән исә торганы бик көчле дип атала.