Екатеринбургта «Шома бас» татар биюләрен башкаручылар бәйгесенә гаризалар кабул ителә
Екатеринбургта «Шома бас» төбәкара татар биюләрен башкаручылар бәйгесендә катнашырга теләүчеләрдән гаризалар кабул итү башлана. Бу хакта Татарстанның Свердловск өлкәсендәге Даими вәкиллеге матбугат хезмәте хәбәр итә.
«Шома бас» төбәкара татар биюләрен башкаручылар бәйгесенең сайлап алу этабы 2024 елның 9 ноябреннән «Свердловск дәүләт өлкә Халык иҗаты сарае» дәүләт автономияле мәдәният учреждениесенең кече залында үткәрелә. Адресы: Екатеринбург шәһәре, Фестиваль урамы, 12.
Фестивальнең Гала-концерты 10 ноябрьдә «Е.П.Родыгин Урал халык сәнгате үзәге»нең зур залында уза. Адресы: Екатеринбург шәһәре, Космонавтлар проспекты, 23.
Яшь төркемнәре: 6-17 яшь; 18 яшьтән башлап бүленә.
Бәйге чыгышлары нәтиҗәләре буенча жюри Гран-при иясен билгели, аңа татар сәхнә костюмнарын тегү өчен 200 мең сумлык сертификат тапшырылачак.
Һәр номинациядә һәм яшь төркемендә 1, 2, 3 дәрәҗә лауреатларын дипломнар һәм кыйммәтле бүләкләр көтә.
Бәйгедә катнашучылар диплом белән бүләкләнә.
Фестивальдә катнашу өчен гаризалар 2024 елның 4 ноябренә кадәр кабул ителә.