БРИКС саммиты узу сәбәпле, Казан мәктәпләрендә көзге каникул 21 октябрьдә башлана
Шәһәрдә БРИКС саммиты узу сәбәпле, Казан укучыларының көзге каникуллары 21 октябрьдән 28 октябрьгә кадәр була. Татарстанның башка муниципалитетларындагы мәктәпләрдә исә каникул 28 октябрьдән 6 ноябрьгә кадәр дәвам итәчәк.
ТР Мәгариф һәм фән министрлыгы барлык мәктәпләргә кышкы каникулны 30 декабрьдән 8 гыйнварга кадәр, ә язгы каникулны 22 марттан 31 мартка кадәр уздырырга тәкъдим итте. Җәйге каникул 27 майдан башлана.
Укучылар өчен каникул башлану һәм тәмамлану вакытын һәр мәктәп мөстәкыйль рәвештә билгели. Иң мөһиме, аның дәвамлылыгы 7 календарь көннән дә ким булмаска тиеш.
Исәп буенча уналтынчы тапкыр үткәреләчәк БРИКС саммиты 22-24 октябрьдә Казанда уза. Моңарчы Татарстан Рәисе Рөстәм Миңнеханов ассызыклаганча, мондый дәрәҗәдәге вакыйганы уздыру – республика өчен зур дәрәҗә һәм җаваплылык.