Камал театры матбугат хезмәте яңа бина турында: Меңнән артык уникаль пыяла деталь
Камал театрының Кабан күле ярындагы яңа бинасын 2023 елда төзи башладылар. Бинаны файдалануга тапшыру исә 2024 елның 22 октябренә билгеләнгән. Билгеле булганча, проект конкурска 14 илдән тәкъдим ителгән 537 вариант арасыннан сайлап алынды.
Фото: © Камал театры матбугат хезмәте
«Татар-информ» хәбәрчесе белән әңгәмә вакытында театрның матбугат хезмәте җитәкчесе Илшат Латыйпов яңа бинаның фасадлары өчен уникаль конструкция проектланды, дип хәбәр итте.
«Фасадта 19 өчпочмак, ә өчпочмакларда 1057 уникаль пыяла деталь – өчпочмаклар, күппочмаклар. Детальләрнең берсенең дә геометриясе кабатланмый. Иң зур өчпочмакның бер ягы озынлыгы 80 метрга җитә. Пыяланың максималь биеклеге – 6 метр. Терәксез күтәртеләчәк түбәнең иң биек консоле 20 метрны тәшкил итә. Фасадка пыяла куюның гомуми мәйданы 9 мең квадрат метр чамасы», - диде ул.
Фото: © Камал театры матбугат хезмәте
Театр интерьеры проектында 11,4 метрга кадәр биеклектәге 16 таҗ-дивар каралган.
«Таҗларның һәрберсе сәхнә залларының берсенә керү юлын күрсәтә һәм аның характерын тапшыра», — дип аңлаттылар матбугат хезмәтендә. Шәрык залы татарның көбәсе һәм изүе белән илһамланып ясалган – тәңкә формасындагы элементлар белән бизәлгән.
«Гипс тәңкәләр Татарстанда эшләнгән, алар тавышны тиешенчә чагылдыруны тәэмин итә. Һәрберсенең авырлыгы 40 килограмм. Театрда барлыгы 2 411 мондый тәңкә бар: залда 1256 тәңкә һәм фойеда 1155 тәңкә», — дип уртаклашты Илшат Латыйпов.
Фото: © Камал театры матбугат хезмәте
Билгеле булганча, камаллылар яңа мәйданчыкны киләсе атна башыннан ук куллана башлаячак. Театрда бу мәгълүматны рәсми рәвештә расламадылар, әмма кире дә какмадылар.
«Октябрь һәм ноябрьдә Камал театры спектакльләре Татарстан урамы, 1 йорт адресы буенча Зур һәм Кече сәхнәләрдә уйнала. Театрның яңа бинасына күченү һәм аны рәсми рәвештә ачу датасы турында мәгълүмат соңрак игълан ителәчәк», – диделәр мәдәният учреждениесенең матбугат хезмәтендә.