Киләсе елга гаилә ипотекасы буенча лимит 2,4 трлн сумга артачак
Киләсе елга гаилә ипотекасы кысаларында банклар өчен лимит 2,4 трлн сумга артачак. Бу хакта Россия Финанс министрлыгының Телеграм-каналында хәбәр ителә.
«Хәзерге вакытта «Гаилә ипотекасы» ташламалы программасы кысаларында ел ахырына кадәр 6,25 трлн сум күләмендә гомуми лимит гамәлдә, банклар кулланмаган 390 млрд сум лимитны да кертеп», диелә хәбәрдә.
Финанс ведомствосы «ДОМ.РФ» программасы операторы белән банклар арасында ипотека кредитлары бирү лимитларын бүлү механизмын камилләштерү өстендә эшли.
Элегрәк Финанс министрлыгында Гаилә ипотекасын 2030 елга кадәр озайту турында хәбәр иттеләр. Ул яңа төзелештә фатир сатып алуга яки шәхси торак йорт төзүгә 6 процент ставка белән бирелә. Әлеге программадан балалы гаиләләр файдалана ала, анда бер бала 6 яшькә кадәрге булырга тиеш.