Венера Ганиева «Болгар радиосы» премиясендә: Без җыр аша тамашачыга тәрбия бирергә тиеш
Россия Федерациясе һәм Татарстанның халык артисткасы Венера Ганиева татар артистлары җыр сәнгате аша тамашачыларга тәрбия бирергә, затлы, зәвыклы җырлар башкарырга этәрергә тиеш дип саный. Бу хакта ул «Пирамида» концертлар залында узган «Болгар радиосы» ХII Милли музыкаль премиясен тапшыру тантанасында әйтте.
«Сәхнәдә җырчы белән тамашачы арасында аралашу бара. Үзебезнең җырларыбыз аша без тамашачыга тәрбия бирергә тиеш. Җыр бүгенге көндә дөньяда бик зур тәрбияви роль уйный. Ул безнең мәдәниятебезнең, җыр сәнгатенең дәрәҗәсен күрсәтә», – диде ул.
Венера Ганиева татар җыр сәхнәсендә күбрәк зәвыклы җырларга игътибар бирергә кирәклеген искәртте.
«Мин шәхсән үзем җитди җырларга таяндым, җитди сүзләргә язылган җырларга күбрәк өстенлек бирдем. Минем максатым – профессиональ авторларның әсәрләрен башкару булды. Мин бит тиз генә эстрада сәхнәсенә килгән кеше түгел, опера сәнгатеннән килдем. Профессионализм бик мөһим фактор, затлы, зәвыклы җырлар башкарырга кирәк. Җырчыларның дөньядагы роле бик зур. Без тамашачы белән һәрдаим мөнәсәбәттә торабыз. Халык мәхәббәтен яулау җиңел әйбер түгел, мин инде 42 ел сәхнәдә, 28 ел остаз буларак Казан дәүләт мәдәният институтында эшлим», – диде җырчы.
Фото: © "Татар-информ", Владимир Васильев