Миңнеханов Татарстанда демография проблемасын хәл итү буенча программа төзергә кушты
Алдагы перспективада республика алдында торган төп бурыч – демография мәсьәләләрен хәл итү. Бу хакта республиканың Сәламәтлек саклау министрлыгы коллегиясендә Татарстан Рәисе Рөстәм Миңнеханов әйтте.
«2015 елда бездә 57 399 бала туган, ә узган елда – 21 922. Әмма бездә 70 мең бала дөньяга килгән еллар да булды», – диде республика башлыгы.
Рөстәм Миңнеханов сүзләренчә, гаиләләрдә беренче балалар аз туа. Шулай ук ул, демографик авырлыкларны җиңү өчен зур көч таләп ителәчәген дә әйтте.
«Без демография турында гел сөйлибез, әмма җитди карарлар кабул итмибез. Ана капиталы бар, башка ярдәм чаралары эшли, әмма булган нәрсәләрдән генә без көткән нәтиҗәгә ирешмәдек. Вазгыятьне үзгәртә алырлык ниндидер башка карарлар кирәк. Быел бу юнәлештә программа әзерләргә кирәк», – диде Татарстан Рәисе.