Россиядә машина сатар алдыннан дилерда техник тикшерү үтү мәҗбүри булачак
Россиядә физик затларны машина сатар алдыннан автомобильнең техник торышын рәсми дилерда тикшерергә мәҗбүр итәргә телиләр. РФ Сәнәгать һәм сәүдә министрлыгында закон проектын әзерләү өчен эшче төркем булдырдылар, дип хәбәр итте «Рольф» дилерлык холдингы генераль директоры Светлана Виноградова. Аның сүзләрен «Газета.Ru» китерә.
Закон проекты аккредитацияләнгән техник хезмәт күрсәтү станцияләренә таләпләрне экспертиза күзлегеннән яңадан карарга, шулай ук тикшерелә торган узеллар һәм агрегатлар исемлеген киңәйтергә ярдәм итәчәк, дип өстәде ул. Әлеге чаралар Россиядә юлларда ватык автомобильләр саны кимүгә китерәчәк. Бу юл хәрәкәте иминлеген арттырачак, дип ассызыклады спикер.
Виноградова билгеләп үткәнчә, машина йөртүчеләр, төзек булмаган автомобиль белән идарә итеп, үзенең гомерен дә, хәрәкәттә катнашучы башка кешеләрнең гомерен дә куркыныч астына куя. Бу проблеманы хәл итү өчен аны закон дәрәҗәсендә контрольгә алырга кирәк, диде Виноградова.
Автоэксперт билгеләп үткәнчә, 2024 елда Россиядә 6 миллион тотылган автомобиль сатылган. Шуларның 24 процентын гына техник контроль һәм сату алдыннан әзерлек белән рәсми дилерлар аша сатканнар.