Лаеш районы башлыгы махсус хәрби операция зонасына 20 тонна гуманитар ярдәм илтте
Лаеш районы башлыгы Илдус Зарипов командасы белән берлектә махсус хәрби операция зонасына барып, андагы 13 хәрби частька техника, азык-төлек һәм төзелеш материаллары тапшырды, дип хәбәр итә «Татар-информ»..
Гуманитар йөк эчендә «Нива» автомобильләре, пилотсыз очу аппаратлары, электрогенераторлар, өйдә әзерләнгән ризык, маскировка челтәрләре, мәктәп балалары җыйган тәм-томнар да бар.
«Бу ярдәм - уртак хезмәт нәтиҗәсе. Эшкуарлар, укытучылар, балалар — берсе дә читтә калмады, — диде Илдус Зарипов. - Без йөкне җибәреп кенә калмадык, ә чынлап та кирәкле әйберләр - рацияләр, позицияләрне ныгыту өчен инструментлар, окоп шәмнәре - җыйдык. Хәрбиләр Лаеш районы аларны ташламавын белә».
Гуманитар ярдәмгә дүрт квадрокоптер, биш радиостанция, ике «Нива» автомобиле, генераторлар, эретеп ябыштыру җайланмасы, 1700 порция өйдә әзерләнгән ризык, 120 маскировка челтәре, витаминлы чәй, кондитер эшләнмәләре, блиндажлар төзү өчен кораллар, окоп шәмнәре һәм дроннар өчен аккумуляторлар кергән.
Акцияне җирле эшкуарлар һәм халыкның актив ярдәме белән Лаеш районы хакимияте һәм «Үзебезнекеләргә ярдәм» район хәйрия фонды оештырды.
«Алдагы йөкне формалаштыра башладык инде. Безнең яклаучылар тылның алар өчен эшләвен тойсын иде», – дип өстәде Зарипов.