Әлмәттә Татарстанның көньяк-көнчыгыш бизнесына ярдәм итүнең яңа үзәге ачылды

Әлмәттә «Татарстан Республикасы сәүдә-сәнәгать палатасы» берлегенең көньяк-көнчыгыш районы буенча департаментын ачу тантанасы булды. «Креатив процесслар фабрикасы» яшьләр үзәгендә узган чара 100 дән артык бизнес һәм хакимият вәкилләрен җыйды. Бу хакта «Әлмәт таңнары» яза.

Ачылышта ТР Сәүдә-сәнәгать палатасы рәисе Шамил Агиев, Әлмәт муниципаль районы башкарма комитеты җитәкчесе Гүзәл Хәбетдинова, Лениногорск муниципаль районы башкарма комитеты җитәкчесе Марат Гыйрфанов, ТР Инвестицион үсеш агентлыгы җитәкчесе урынбасары Марина Епифанцева катнашты.

Шамил Агиев белдергәнчә, югары банк процентлары һәм башка чакырулар белән характерлана торган агымдагы икътисади вазгыятьтә бизнеска кирәкле ярдәм күрсәтү аеруча мөһим.

«Безгә монда бизнеска ярдәм итү өчен булган барлык инструментларны күрсәтү мөһим. Нефть төбәкләре яңа департамент аша барлык ярдәм чаралары белән якыннанрак таныша алачак», - дип белдерде ул.

Әлмәт муниципаль районы башкарма комитеты җитәкчесе Гүзәл Хәбетдинова төбәктә үзмәшгульләр һәм кече бизнес вәкилләре санының бик тиз үсүен билгеләп үтте. Ул ассызыклаганча, департамент эшмәкәрлекне үстерү, тәҗрибә уртаклашу һәм җирле компанияләрнең потенциалын ачу өчен платформа булачак, бу бөтен көньяк-көнчыгыш төбәкнең икътисади күрсәткечләре үсешенә ярдәм итәчәк.

«Кече һәм урта бизнесны үстерү –төбәкнең тотрыклылыгының нигезе», - диде Гүзәл Хәбетдинова.

Республиканың көньяк-көнчыгыш эшлекле бергәлегенә департамент директоры Ринат Сабиров тәкъдим ителде.

Департаментны ачу тантанасы палатаның яңа катнашучыларына әгъза билетлары тапшыру һәм катнашучыларга спикерлар белән турыдан-туры аралашырга мөмкинлек биргән сораулар һәм җаваплар сессиясе белән тәмамланды.