Ижевскида Республикакүләм «Татар кызчыгы, татар малае – 2025» бәйгесе җиңүчеләре билгеле
Ижевск шәһәренең Халыклар Дуслыгы йортында 6нчы тапкыр Республикакүләм «Татар кызчыгы, татар малае – 2025» бәйгесе узды. Бәйгедә 8 бала — 4 малай, 4 кыз көч сынашты. Бу хакта Бөтендөнья татар конгрессы матбугат хезмәте хәбәр итә.
Балалар гаиләләре турында сөйләделәр, үз осталыкларын җырда, биюдә, шигырь сөйләүдә күрсәттеләр. М.Җәлилнең «Карак песи»ен сәхнәләштерделәр. Бәйгенең соңгы өлешендә бишек җырларын балалар әниләре белән башкардылар.
«Татар кызчыгы- 2025» исеменә 107нче балалар бакчасында тәрбияләнүче кыз, ә «Татар малае- 2025» исеменә Можга шәһәреннән килгән егет лаек булды. Бәйгенең кунаклары — милли сәясәт министры урынбасары, Халыклар дуслыгы йорты директоры, иҗтимагый палата җитәкчесе һәм башкалар иде.
Җиңүчеләргә 7 меңлек самокат, бүтән номинацияләргә зур өстәл белән урындык, һәр егеткә түбәтәй, һәр кызга калфаклар, китаплар бүләк ителде. Балаларның әниләре дә рәхмәт хатлары, баллы күчтәнәчләр белән бүләкләнде, диелә хәбәрдә.