Апанай мәдрәсәсе мәктәп яшендәге балаларны ислам нигезләре буенча җәйге курсларга чакыра
Апанай мәдрәсәсендә мәктәп яшендәге балалар өчен Ислам нигезләре буенча ике атналык җәйге курслар уздырылачак. Курсларда дин дәресләреннән тыш мәдәни чаралар, музейларга экскурсияләр, уеннар һәм мастер-класслар оештыру каралган. Бу хакта Апанай мәчете каршында эшләүче, «Иман» мәдәният-мәгьрифәт үзәгенең матбугат хезмәте җитәкчесе Гөлнира Абдрахманова хәбәр итә.
«Балаларны иман нигезләре, ислам тарихы, әхлак дәресләре, пәйгамбәрләр тарихы белән таныштырабыз. Максатыбыз – балаларга татар мохите тудыру, мәдәниятебез, телебез, гореф-гадәтләребез белән бәйле мастер-класслар, уеннар, чаралар уздыру, кызыклы шәхесләр белән таныштыру. Ял аралаш тәрбияви һәм интеллектуаль чаралар уздырыла», – диелә хәбәрдә.
- Ир балалар өчен курслар 16 июньнән 28 июньгә кадәр. Кызлар өчен 30 июньнән 12 июльгә кадәр дәвам итәчәк.
Курсларга мәдрәсә администраторына шалтыратып язылырга мөмкин.